25Օգոստոս

Սեխի ճանճ / Myiopardalis pardalina Bigot.

Վնասում է սեխը և դդմազգիների ընտանիքին պատկանող այլ տեսակները:

Հասուն ճանճերն ունեն 5-7մմ երկարություն, թևերի վրա առկա են լայնակի դեղնամոխրագույն գծեր: Ձվերն ունեն 1մմ երկարություն, սպիտակ են, փայլուն, օվալաձև: Վերջին հասակի թրթուրներն ունեն 11մմ երկարություն, կաթնասպիտակավուն են, առանց ոտքերի: Հարսնյակներն ունեն 6-8մմ երկարություն, գույնը՝ բաց շագանակագույնից մինչև մուգ շագանակագույն, տակառաձև: Հասուն ճանճերի թռիչքը համընկնում է սեխի ծաղկման և պտուղների կազմավորման փուլերին ու տևում է մոտ մեկ ամիս: Ճանճը սնվում է պտղահյութով, որը պտուղների վրա է դուրս գալիս էգերի առաջացրած անցքերից: Զուգավորումից հետո էգէրը մեկական ձվադրում են երիտասարդ պտուղների տակ:

 Մեկ էգը 20-30 օր շարունակ կարող է դնել մի քանի տասնյակ ձու: Ձվադրումից 2-7 օր անց ձվերից դուրս են գալիս թրթուրները, մտնում են պտղի մեջ և սնվում: Վնասված պտուղները սովորաբար վարակվում են երկրորդային փտումներով: Վերջին հասակի թրթուրները հարսնյակավորվում են պտուղներում և հողում: Հարսնյակի փուլը տևում է 13-20 օր: Վնասատուն ձմեռում է հարսնյակ փուլում, հողում՝ 5-15 սմ խորության վրա, կեղծ բոժոժի մեջ՝ տալով 2-3 սերունդ:

  Մոնիթորինգը.

 Սեխի ճանճի մոնիթորինգի և հասուններին որսալու նպատակով կիրառում են հատուկ թակարդներ: Խորհուրդ է տրվում նաև վեգետացիայի ընթացքում պարբերաբար զննել պտուղները՝ դրանց վրա վնասատուի բացած անցքերը հայտնաբերելու նպատակով:

Կանխարգելիչ-նախազգուշական միջոցառումներ.

• Կիրառել ցանքաշրջանառություն կամ մշակաբույսերի հերթափոխություն,
• Վաղահաս սորտերի սերմերի ցանքը կատարել փոքր-ինչ վաղ,
• Հողը մուլչապատել պլաստիկ մուլչով,
• Վնասված պտուղները հավաքել, դաշտից դուրս բերել և թաղել հողի խորը շերտի տակ,
• Բերքահավաքից հետո հավաքել, դաշտից դուրս բերել և ոչնչացնել բուսական մնացորդները,
• Դաշտում և հարակից տարածքներում պայքարել մոլախոտերի դեմ

Քիմիական պայքար.

Հասուն ճանճերի դեմ անհրաժեշտ է պայքար կազմակերպել ձվադրումից առաջ՝ կիրառելով միջատասպան որևէ միջոց և հերթափոխելով ազդող նյութը: